ORANJESTAD- Junior Ranger a kaba di sera nan evento anual di interkambio. Hóbennan di tur seis isla a bini huntu pa siña tokante e biodiversidat úniko ku tin denter di Karibe Hulandes i nan a pone piedra di fundeshi na e futuro kolaborashon interinsular. 

Ku bista di salimentu di solo riba laman mainta te na kaminata anochi bou di ‘night glow in the dark’, e studiantenan akí tabatin un siman yená ku rekuerdo ku nan lo tesorá pa bida largu.

Un pida di fundeshi di Dutch Caribbean Nature Alliance (DCNA) ta e deseo di elevá edukashon ku ta enfoká riba naturalesa rònt Karibe Hulandes. Un di e hèrmèntnan disponibel pa e islanan ta empoderashon di hubentut, i kiko lo por ta un mihó manera pa hasi uso i kontrolá e energia akí ku ta pa medio di DCNA su programa di interkambio anual di Junior Ranger. E oportunidat úniko akí ta trese hóbennan di tur seis isla huntu pa siña tur kos tokante e biodiversidat eksepshonal ku Karibe Hulandes tin, i traha huntu pa desaroyá abilidatnan positivo, koperativo i sosial.

E tema di e interkambio di e aña akí tabata Servisionan di Ekosistema i Kon Nan ta Sostené Nos Tur! Hinter e siman, e Junior Rangernan a siña kon pa identifiká flora ku founa marino i terestre durante aktividat di snòrkel, di kaminata i di kore den kayak den e vários habitatnan rònt Statia i St Maarten.

E siman a start na Statia ku kampamentu den e hardinnan botániko, loke a krea e oportunidat perfekto pa tur hende bai den profundidat di naturalesa. Ningun hende no tabata parse di wòri pa lanta mainta tempran pa eksperensiá e magnífiko salimentu di solo na horizonte di laman. Durante dia, e Junior Rangernan por haña eksperensia di práktika den monitoreo di espesienan invasivo dor di bai riba patruya di yuana huntu ku rangernan di STENAPA. Dor di e monitoreo, kada ranger a siña pa hasi distinshon entre e diferente supespesienan di yuana i nan a siña dikon ta importante pa vigilá tendensianan den populashon.