Apresiabel abitantenan di Boneiru, 

Nos isla resientemente a konosé vários kaso di tiroteo. E susesonan aki ta afektá nos tur profundamente. Violensia di tiramentu ta algu ku nos isla no a kustumbrá kuné, i el a afektá e trankilidat den nos komunidat. Agentenan di Kuerpo Polisial Hulanda Karibense (KPCN) ta reakshoná sin duda riba kada notifikashon ku nos risibí. Ku dedikashon, kurashi i un sentido grandi di responsabilidat, nan ta riska nan propio seguridat pa restablesé trankilidat i siguridat den nos komunidat. 

Nos reshèrshinan ta traha dia i anochi, inkansablemente i ku presishon, pa solushoná e kasonan aki. E impakto ku e insidentenan aki tin riba komunidat ta grandi, pero e esfuersonan di nos kuerpo ta keda mesun fuerte. P’esei mi ta sumamente orguyoso di e determinashon i profeshonalismo ku kua nos agentenan, bou di sirkunstansianan tin biaha difísil, ta sigui lucha pa un Boneiru seif. Nan ta hasi e trabou aki ku hopi dedikashon, pero nos mester rekonosé ku nan no por hasi esaki nan so.

Manera gezaghèber a enfatisá anteriormente, nos mester di bo(so) ayudo. Ta hopi importante pa mèldu situashon sospechoso pa nos por tuma akshon efektivo. Kada tep ta balioso i bo notifikashon por ta e lenk ku falta den un investigashon. 

E seguridat di nos isla ta i ta keda nos prioridat mas haltu, pero nos ta karga e responsabilidat aki huntu. Mi ta komprondé ku tin biaha por ta difísil pa mèldu situashonnan sospechoso, òf ku bo ta duda den nan seriedat. Pero mi ta sigurá bo ku kada notifikashon ta importante. Ta p’esei nos ta ofresé bo e posibilidat pa mèldu anónimo via e liña di tep 9310. Esaki ta garantisá ku bo identidat ta keda protehá, miéntras ku bo informashon por yuda nos aktua lihé i efektivamente. 

Nos agentenan polisial lo sigui lucha pa un Boneiru seif, pero ku boso yudansa nos por logra mas ainda. Huntu nos lo sòru pa kita armanan for di riba kaya i ku nos komunidat ta keda protehá di e peliger inminente di violensia.