KRALENDIJK – Tourism Corporation Bonaire (TCB) a anunsiá su sifranan preliminar pa luna di yüni 2024, for di kua ta resultá ku den e luna ei Boneiru a yama bon biní  na 12.117 bishitante stayover. Esaki ta nifiká un oumento di 5,04% kompará ku luna di yüni 2023. Den e mesun luna aña pasá Boneiru a yama bon biní na 11.536 bishitante stayover. Si nos bai kompará ku e prestashonnan di promé ku e pandemia, e ora ei nos ta mira ku den luna di yüni 2019 por ehèmpel, Boneiru a  yama bon biní na en total 12.500 bishitante. 

E bishitantenan hulandes a keda e grupo di mas grandi ku 41% di e total, siguí pa e merikanonan ku 31%. Banda di esaki bishitantenan for di Kòrsou a representá 14,7% di nos bishitantenan. Aruba, Bélgika, Alemania i Canada tambe a aportá konsiderabelmente na Boneiru su sektor turístiko.

E bishitantenan merikano a bini prinsipalmente for di Florida, Texas, Georgia,  California, Colorado, Pennsylvania, New York i otro estadonan grandi. E gruponan di edat ku representashon mas grandi tabata esun di 45 pa 54 aña (22%) i esun di 55 pa 64 aña (21%), loke ta un indikashon di un interes fuerte serka biaheronan di edat medio. E bishitantenan hulandes a bini prinsipalmente for di Noord-Holland, Zuid-Holland i Noord-Brabant, kaminda e gruponan di edat di 55 pa 64 aña (20,8%) i di 45 pa 54 aña (19,3%) a dominá. 

Mas aleu den luna di mei 2024 Boneiru a yama bon biní na 27.885 bishitante krusero riba en total 7 barku kursero.