KRALENDIJK – E partnernan di FUSE Caribbean di Kòrsou lo kuminsá ku prosesamentu na gran eskala di shushi di plèstik riba Boneiru bou di e nòmber FUSE Boneiru.

E proyekto ta wòrdu realisá den kolaborashon ku Selibon, Kooyman, Bon Recycling, HR Group i Openbaar Entity Bonaire (OLB).

Despues di un komienso eksitoso na Kòrsou kaminda FUSE Caribbean ta aktivo pa mas ku un aña, desperdisio di plèstik lokal awor tambe ta wòrdu kombertí den materialnan di konstrukshon sostenibel na Boneiru. Na Kòrsou ya kaba mas ku 56.500 kilo di plastic a wòrdu prosesá dor di FUSE.

Na Boneiru, FUSE Caribbean ta traha huntu ku Selibon, ku ya a rekohé 13.000 m3 di shushi di plèstik separá. Aktualmente ta preparando e FUSE Kitchen na Bonaire pa prosesa esaki. E materialnan di konstrukshon ku ta bai produsí lo wòrdu bendí na Kooyman na Boneiru.

Bon Recycling ta ofresé fasilidatnan pa e FUSE Kitchen i e mashinnan nesesario. HR Group ta aselerá e proseso ku nan tim di spesialistanan tékniko, loke ta krea empleo i ta kontribuí na edukashon i inovashon.

FUSE Boneiru ta promové un ekonomia sirkular dor di kombertí plèstik tirá afó den materia prima balioso. E inisiativa aki ta kontribuí na un Boneiru mas limpi, ta krea empleo i ta mehorá kalidat di bida, i ta protehá Boneiru su identidat úniko komo un Destinashon Blou.

Separashon di sushi

FUSE Caribbean ta hasi un yamada na residentenan i companianan pa partisipá aktivamente den separashon di sushi pa minimalisá e impakto di plèstik riba naturalesa.