KRALENDIJK – Dia 17 di ougùstùs ta bai tin un dia di limpiesa, kaminda tur bario ta bai tin baki grandi pa depositá shushi aden. Diputado Nina Francees-Den Heyer a bisa Boneiru no ta limpi manera ántes. “Pa e motibu aki nos ta bai organisá un akshon grandi di limpiesa. 

Un isla limpi tin influensia positivo den mente di e hende. Di otro banda, si e isla ta shushi, e tin efekto negativo den e hende su mente. Ántes e Boneriano por a broma ku su isla ta limpi, ta lástima ku esei no ta e kaso mas. “Ta responsabilidat di kada un di nos pa hasi Boneiru limpi i no stens ku ta SELIBON su tarea”, asina Den Heyer a bisa. 

Huntu ku diputado Nina, tambe a papia Zjuriena Balborda-Isenia, konsehero di maneho riba tereno di estudio i bienestar di empleado di OLB. E a menshoná ku a papia ku hendenan di bario i SELIBON i mas organisashon tokante e akshon di limpiesa. “Tin stènt i músik, kos pa bebe na e sitionan ku ta bai tin baki pa pone shushi aden. 

Sitio

Sitionan ta Stadion di Playa, Sentro di Bario Tera Kòrá, Sentro di Bario Nikiboko, Fundashon Avanti na Antriol, Kaminda Djabou, Sentro di Bario Nort di Saliña, na Rincon Stadion Antonio Trenidad i na entrada di Rincon, kaminda ta bai Morotin. Ta bai parti saku pa yena shushi aden pa hasi limpiesa riba e dia. Mas informashon ta sigui.”