KRALENDIJK – Riba Dia Internashonal di Protekshon di Dato, Komishon Supervisor di Protekshon di Dato Personal BES (Komishon) lo dediká atenshon na e fenómeno konosí komo pèrdida òf lèkmentu di dato. Ta papia di un pèrdida òf lèkmentu di dato na momento ku tersero haña akseso ilegal òf no outorisá na dato personal, por ehèmpel debí na un USB-stick ku a pèrdè aksidentalmente, un e-mail ku a bai na un adrès robes òf un atake di karakter kriminal riba un server ku ta kontené dato personal.

Pèrdida òf lèkmentu di dato komo tema di Dia di Protekshon di Dato

Dia 28 di yanüari, privasidat lo ta e tema sentral. E aña akí, Komishon lo dediká Dia Internashonal di Protekshon di Dato na konsientisá e organisashon- i siudadanonan tokante e peliger di pèrdida òf lèkmentu di dato, esta, e fenómeno kaminda dato personal ta kai den man di persona no outorisá. Un organisashon tin e obligashon di tuma medida di prekoushon pa protegé mihó posibel e datonan personal ku e ta prosesá. I den kaso ku tòg e datonan kai den man robes, e organisashon tin ku mèldu esei na e siudadano- òf empresanan en kuestion.

Algun manera hopi usá pa haña akseso na dato personal i despues malusá esakinan ta phishing, kaminda un persona ta risibí un e-mail (falsu) pidiendo pa e bolbe manda dato personal sensitivo, i malware den forma di un aplikashon di kòmpiuter diseñá pa manda dato sekretamente pa un persona ku ke malusá esakinan. Un organisashon tin e obligashon di limitá, mas tantu posibel, e daño kousá pa un pèrdida òf lèkmentu di dato. 

Mèldu bo pèrdida òf lèkmentu di dato

‘Pa por haña un bista di e kasonan di lèkmentu di dato ku ta presentá na Boneiru, Sint Eustatius i Saba, nos ta pidi pa mèldu tur pèrdida òf lèkmentu di dato na sekretariado di Komishon. Asina, sekretariado por duna tep tokante kon pa evitá e tipo di pèrdida òf lèkmentu akí den futuro i konsehá si, por ehèmpel, mester enbolbí polis den kaso ku e lèkmentu di dato ta debí na un atake di karakter kriminal’, segun Sekretario di Komishon, Sra. Roëlla Pourier. Riba korto plaso, komishon lo publiká un foyeto, den kolaborashon ku e unidat di Cybercrime di Kuerpo Polisial Hulanda Karibense (KPCN) i Kámara di Komèrsio Bonaire, ku lo ofresé un plan di paso pa prevení pèrdida òf lèkmentu di dato mas tantu posibel.

Konsientisashon riba prevenshon di pèrdida òf lèkmentu di dato

Den su komunikashon ku e siudadano- i empresanan na Boneiru, Sint Eustatius i Saba, tambe Komishon lo dediká atenshon na konsientisashon riba e peligernan di pèrdida òf lèkmentu di dato. Ta trata aki no solamente di riesgo finansiero, sino tambe froude di identidat i e konsekuensianan sikológiko den kaso ku dato relashoná ku un persona su salú keda divulgá sin outorisashon. Ta importante pa tantu e organisashonnan komo e siudadanonan ta konsiente di e peligernan di pèrdida òf lèkmentu di dato i sa kon nan por prevení i limitá esakinan mas tantu posibel. 

Komishon ta un órgano outónomo, konsistí di sr. Glenn Thodé (presidente), Sra. Esther Pourier-Thodé (presidente suplente) i Sr. Jacques van Eck (miembro), ku ta supervisá prosesamentu (inkluso almasenamentu i uso) i protekshon (mediante medida tantu organisatorio komo teknológiko) di dato personal. Riba su wèpsait www.cbpbes.com, Komishon ta publiká informashon ku e meta di hasi e tema di protekshon di dato personal mas aksesibel pa públiko en general. Pa pregunta tokante kon mester atendé ku dato personal òf pa mèldu un lèkmentu di dato, por tuma kontakto ku sekretariado na [email protected], òf via telefòn na +599 7159114.