KRALENDIJK- E dia habrí ku djasabra a tuma luga na departamentu di LVV por wòrdu deskribí komo un eksito rotundo. Hopi hende a hasi uso di e oportunidat pa bishitá e departamento i pa wak kiko a logra den transkurso di e aña ku a pasa bou di guía di Maurice Adreaans. 

E bishitantenan por a mira ku nan propio wowo ku tera di Boneiru no ta asina infértil i seku, manera hopi biaha ta wòrdu bisá, basta ta hasi uso di téknikanan i ekiponan adekuá.

Den e añanan tras di lomba Hulanda kada bes a pone énfasis riba e tema di produkshon di berdura i fruta lokal pa hasi e isla ménos vulnerabel pa disrupshon den importashon i/o transporte. 

Mas fresku

Otro bentaha di produkshon lokal ta ku no mester paga pa transporte, ku a bira hopi karu últimamente, pero tambe berdura i fruta lokal ta hopi mas fresku ku esnan ku mester wòrdu importá i tin biaha ta keda drumi simannan largu den konteiner, promé ku nan ta den supermerkado lokal.