KRALENDIJK- Eks-konsehal pa Movementu di Pueblo Boneriano (MPB) Din Domacassé riba djabièrnè a saka un komunikado di prensa, kaminda e ta kritiká su anterior kolega Cyrill Vrolijk ku palabra hopi skèrpi. 

E krítika di Domacassé ta un reakshon riba un deklarashon di Vrolijk, ku algun dia pasá a bisa di sigui sostené e aktual koalishon, entre otro pasombra diputado di Finansa Clark Abraham tabata mustra determinashon den drechamentu di kos ku e anterior koalishon di MPB i UPB lo a hasi robes. 

Domacassé den su deklarashon entre otro ta kritiká e echo ku e partnernan di koalisahon aktual a keda ketu pa loke ta traha ‘hortamentu’ di Abraham di 20.000 dòler di Fundashon Mariadal. 

Tambe Domacassé a mustra riba oumentu di sèn pa frakshonnan den konseho insular i  hisamentu di daggeld sin ku un debata públiko a tuma lugá riba esaki. 

Malu

E miembro prominente di MPB ta  bisa di ta wak mas kos malu, manera un stankamentu di ekonomia, falta di sosten pa negoshante lokal i e krítika ‘sin base’ kontra e koperativa di piskadó,  Piskabon. 

“Nos ta spera di tende di Cyrill unda e la saka e kurashi pa defende un Gobièrnu ku pa mi i pa hopi hende den pueblo ta esun di mas malu ku a yega di goberná den Boneiru su historia”, asina Domacassé ta konkluí.