KRALENDIJK – Diputado Anjelica Cicilia di Infrastructura no ta kompletamente felis ku e vangrail ku ta wòrdu instalá aktualamente na un parti di Kaya Gobernador N. Debrot. Cicilia a bisa esaki djabièrnè atardi den respuesta na preguntanan di ABC Online Media.

“Mi tin ku bisa ku mi mes tin sintimento miksto tokante esaki. Si mi ta honesto, mi no haña ku e ta bunita i tampoko no ta pas den e ambiente. Pero na otro banda, na e momentu aki e ta e úniko manera pa hasi e situashon mas sigur pa peatón den e área.”

Cicilia a splika ku e kaminda tabata wordu asfaltá no muchu tempu atras, pero no a hasi ningun otro mehorashon na infrastructural aktual. “Esaki ta nifiká ku nos tin limitashon grandi den e posibilidatnan pa kreá un situasho nas seif pa hende ku ta kana eibanda. Lástimamente un vangrail ta e úniko opshon na e momentu aki”

Segun Cicilia, e reakshonnan ku ela risibí di hende ta mesklá. “Hopi hende realmente ta haña ku esaki no ta bunita, pero tambe tin bosnan, prinsipalmente di hende ku ta kana einan, ku ta bisa nan ta sinti nan mes mas seif pa motibu di e vangrail.”

E vangrail lo wòrdu instalá solamente na banda drechi di e kaminda di Sabadeco i Hato pa Playa. “Tin ya un kaminda pa hende kana, , i esaki ta motibu ku e vangrail ta wòrdu instalá na e banda ei,” Cicilia a bisa.

Ambishon

Cicilia a indiká ku su ambishon personal ta bai mas leu, ku e lokual ku ta wòrdu implementá aktualamente. “Mi lo ke tantu mas pa nos kamindanan i bulevarnan. No solamente hasi nan mas sigur, pero pero prinsipalmente mas útil i bunita, por ehèmpel ku mata i palu bunita. Sinembargo, esaki lo ta un proyekto di un durashon muchu mas largu”.