Kralendijk – E dokumental nobo ‘Piskadó pa semper’ ta konta e historia di piskadónan Boneriano, nan pashon i e retonan ku nan ta enfrentá. E dokumental tambe ta pone atenshon riba e kolaborashon ku otro hende pa garantisá nan fishi pa futuro.

Diabièrne pasá, SKAL, Wereld Natuur Fonds i FuHiKuBo a presentá e dokumental ku orguyo na un grupo selektá di representantenan di gobièrnu, komunidat di peska i trahadónan den sektor di naturalesa. ‘Piskadó pa semper’ ta dediká na Raynel Cecilia, ku a traha ku hopi dedikashon pa dokumentá e sektor di peska na Boneiru. Durante e lansamentu di e dokumental, deputado Anjelica Cicilia a bisa den su diskurso ku el a bai skol ku Raynel i ku e ta hopi felis ku e dokumental ta dediká na dje.

E dokumental ta un homenahe na peska, unu di e fishinan mas bieu na Boneiru. Peska ta importante pa kultura, ekonomia i provishon di kuminda di e isla. Pero piskadónan ta para dilanti di un tempu difisil. Mundu ta kambia i asina tambe e manera ku piskadónan Boneriano ta hasi nan trabou. Naturalesa ta riba preshon, e gastunan di bida ta subi i e poblashon ta krese.

Koperativa Piskabon

Den e dokumental tambe ta pone atenshon riba e formashon di koperativa Piskabon, ku ta representá e piskadónan. A presentá e kolaborashon entre Piskabon i diferente partner, manera STINAPA i Wereld Natuur Fonds. E organisashonnan akí ta traha huntu pa amplia konosementu i konsientisashon riba peskeria sostenibel, sortonan di bestia ku mester protekshon, i proyekto di rekonstruí naturalesa. Ku esfuerso di hopi hende, Piskabon a bira un organisashon rekonosí ku ta kontribuí na desaroyo di piskadónan, kultura i naturalesa di Boneiru.

Online

E dokumental ta disponibel online riba kanal di YouTube di WWF Dutch Caribbean. Pronto lo organisá presentashonnan públiko pa henter komunidat lokal.