KRALENDIJK – Riba 16 di febrüari Korte den Promé Instante di Boneiru a sentensiá dos hòmber pa intento di asesinato i violensia públiko. Ámbos tabata embolbí den un bringamentu den Kaya Grandi riba 14 di òktober aña pasá. E víktima a sufri leshonnan grave.

Madrugá di 14 di òktober 2022 tabatain un bringamentu entre kuater hòmber den Kaya Grandi. Motibu di e bringamentu no tabata masha kla, pero echo tabata ku tur esnan embolbí a konsumí hopi alkohòl. A kompartí e imáhennan di e bringamentu aki via medionan sosial, lokual a pèrkurá pa un sentimentu di indignashon i inseguridat serka pueblo di Boneiru.

Ta sospechá e dos rumannan djafó, J.R. di 19 aña i H.A.C. di 33 aña di intento di asesinato i violensia públiko. A skòp e víktima diferente biaha kontra su kabes, ku konsekuensia ku e no por traha ainda komo konsekuensia di e leshonnan risibí.

A sentensiá ámbos hòmber pa intento di asesinato. A sentensiá J.R. di 19 aña na 18 luna den sentro di detenshon hubenil di kua un gran parti ta kondishonal ku un tempu di prueba di dos aña. Parti di e sentensia aki ta tambe supervishon di Ofisna di Resosialisashon, sigui entrenamentu di prevenshon di alkohòl i violensia i eventual tratamentu na Mental Health Carribean (MHC). A sentensiá H.A.C.  di 33 aña na sinku aña di kastigu di prizòn. Mientrastantu el a apelá kontra e sentensia aki.

Ministerio Públiko ta spera ku e sentensianan aki lo tin un efekto preventivo pa evitá tipo di ‘violensia sin sentido’ i ku habitantenan di Boneiru por sinti nan mas seif.