ORANJESTAD – Duana di Aruba ta pidi pasaheronan pa tene kuenta ku produktonan ku ta rekerí pèrmit di importashon na ora di regresá Aruba.

Esaki ta konta pa por ehèmpel remedi, aparatonan elektróniko, mata, karni i produktonan derivá di karni.

Si un pasahero ke bini ku remedi e mester pidi un pèrmit di importashon serka Inspekshon di Salubridat Públiko. Si bo ta usa remedi diariamente, bo mester pidi un pasaporte medisinal serka bo dòkter pa na ora di regreso bo por prueba ku e remedinan ta pa propio uso. E agente di duana por kontrolá esaki na ora di yegada na Aruba.

Pa sierto aparatonan elektróniko un pèrmit di importashon di Gerente di Asuntunan di Telekomunikashon ta obligatorio. Nos ta papia aki di drones i aparatonan di telekomunikashon.

Pa importá karni mester di un pèrmit di importashon di Servisio Veterinario. Ta prohibí pa importá karni òf produktonan derivá di karni for di Amerika del Sur i Amerika Sentral. Ta pèrmití pa importá karni i produktonan derivá di karni solamente for di mataderonan sertifiká di Merka i Europa.

Pasaheronan ku ke bini ku matanan for di eksterior, mester di un pèrmit di importashon di Direktorado di Agrikultura, Krio di bestia i Piskeria.

Si durante kòntròl na ora di yegada duana interseptá aríkulonan prohibí, lo konfiská esakinan mésora i por duna e pasahero un but i hasta por detené e pasahero.