ORANJESTAD – Duana di Aruba ta bai kontrolá na aeropuerto si lèptòp- i telefonnan ku pasaheronan ta bini kuné ta kumprá na Aruba. Esei Duana ta partisipá riba su página di Facebook.

Si pasaheronan no por prueba esei mester paga derecho di importashon. Duana tin e outoridat pa inspektá merkansianan ku ta importá i eksportá; méskos ta konta pa merkansia di tránsito.

Prueba di pago di Aruba no ta nesesario, Duana ta sigui bisa. Registrando bo merkansia(nan) bo por evitá ku mester paga.

Formulario Temporal di Eksportashon

Segun Duana ta trata di tur aparato personal manera lèptòp, telefon selular i tèblet di kua e pasahero no tin prueba ku a kumpra e aparato na Aruba òf den estranheria i ku konsekuentemente  derecho di importashon ta pagá kaba.

E Formulario Temporal di Eksportashon ta sirbi komo formulario di registrashon i por download esaki ònlain. E formulario ta un prueba ku e pasahero a bandoná Aruba ku e aparatonan i ta prevení ku na ora di regresá bèk ta kobra derecho di importashon.

Mester prent e formulario i tuma un stèmpel dia ku ta biaha na ofisina di duana na aeropuerto.

(https://secure.overheid.aw/document.php)