ORANJESTAD – Despues ku resientemente Aruba a risibí e promé karga di fruta i bèrdura for di Venezuela, a sigui ku e entrega siman pasá. Rapòrtnan di Duana di Aruba i dokumentunan na Venezuela ta konfirmá esaki. Den e promé siman a importá alrededor di 70.000 kilo, un subida di mas ku 100 porshento.

Posiblemente e subida di importashon tabatin un bahada di preis di produktonan agríkola komo konsekuensia.

Siguridat di kuminda na Aruba ta importante. Un suministro konsistente i sufisiente di kuminda di kalidat ta esensial pa tene pueblo di Aruba salú. E gastunan di kosto di bida ta un faktor krítiko pa e kalidat di bida ei, i e preis di kuminda ta un faktor importante.

Bentaha di komersio ku paisnan den besindario ta kondusí na bahada di gastunan di transporte, loke ta yuda pa tene preisnan di produkto abou i ta yuda pa reakshoná rápido riba posibel krísis di kuminda.