Kralendijk- Na e islanan BES histórikamente tin masha poko interes den votamentu pa elekshon di Tweede Kamer. En general e partisipashon na elekshonan hulandes no ta surprasá un 25% o sea masomenos un kuart di esnan ku por vota.

Tòg e aña aki ta parse di tin un tiki mas interes pa loke ta traha e elekshonnan pa un parlamentu nobo na Hulanda. Remarkabel ta ku na Boneiru tin poko kos ta tumando lugá, pero na nos isla hermana di St. Eustatius tin no ménos ku 4 kandidato riba lista pa e elekshonan aki. Ta trata di Koos Sneek, ku ta riba lista pa CDA pa e ‘Kieskring BES’, i tambe 3 kandidato mas ku ta riba lista di e partido Ubuntu en persona di Carlos Spanner, Charles Woodley i Kenneth Cuvelay.

Na Saba tambe tin un kandidato, Lysanne Charles, ku ta aparesé riba e lista di Bij1. Ámbos Bij1 ku Ubuntu tin hopi sosten di kandidato i votadó di desedensia karibense. Nan ta kampañá entre otro pa mas igualdat i kontra di diskriminashon.

Boneiru

Den tur esaki ta parse ku Boneiru a manera keda atras. Di Boneiru no tin niun hende ku ta aparesé riba lista di un partido hulandes pa ku elekshon di Tweede Kamer. James Kroon a laga sa ku e ta kampañá pa CDA, Clark Abraham en general ta kampañá pa Partij van de Arbeid (PvdA), mientras ku den seno di MPB hopi biaha tin sosten pa kandidatonan pa D66. Sinembargo e kampaña ta hopi ‘lauw’ kompará ku e situashon na St. Eustatius i Saba.

Saba

Na Saba diputado di finansa Bruce Zagers a komuniká siman pasá ku e tambe ta pone su mes tras di kampaña di sekretario di estado Raymond Knops. Apenas un par di ora despues di e anunsio di Zagers, Knops a laga sa ku Saba por konta ku un sosten finansiero adishonal di 1 mion di dolar.

Ta di mira awor si e aktividat primeramente na St. Eustatius i Saba lo kondusí na un porsentahe mas grandi di siudadanonan ku ta vota pa elekshon di Tweede Kamer. Tambe ta interesante pa mira kon Boneiru ta kompará ku e otro dos islanan ku ta forma parti di BES.

---

Lesa tambe:

• 
  Caribe Nobo, Bondigro i Warehouse a bolbe resultá ta e supermerkadonan mas barata na Boneiru 
• 
  Kuerpo di bombero Saba ta optimalisá liderazgo i forsa operashonal
• 
  Diskushon tokante salario di griffier Boneiru no ta úniko: Na Hulanda tambe tin diskushon 
• 
  Segun Bonaire Human Rights Organization krísis di klima tin su raisnan den kolonialismo
• 
  Charla: Papiamentu- Idioma di Resistensia