ORANJESTAD – Un famia di dos adulto i dos mucha na Aruba tabatin mester di 5.070 florin den luna di yüni pa tene kabes riba awa. Esei ta 24 florin mas ku e luna anterior, segun Ofisina Sentral di Estadístika, CBS.

Kompará ku e mésun luna un aña pasá e famia asta mester di 300 florin mas pa sobreviví, Ofisina Sentral di Estadístika, CBS ta kalkulá den su raportahe di inflashon di tur luna.

Un famia di un persona mester di 143 florin mas pa luna kompará ku aprel di aña pasá. Pa ta mas eksakto e mester di 2.414 florin.

Inflashon

Preisnan na Aruba a subi den luna di yüni ku un averahe di 0.7 porshento, kompará ku luna di mei i mas ku dòbel kompará ku luna di aprel.

Kompará ku e último djesdos lunanan produktonan a subi ku 5.3 porshento na Aruba.

Shete di e djesdos sektornan ku ta midi e kambionan di preis a topa ku e subidanan di preis. Spesialmente transporte a bira algu di 4.5 porhento mas karu i kuminda i bibida ku no ta kontené alkohòl a subi, méskos ku na luna di mei, ku un averahe di 1.2 porshento.

Makutu básiko

E makutu básiko ku CBS ta usa pa midi inflashon ta konsistí di 408 produkto i servisio. Algu mas ku mitar, 182 produkto, a bira mas karu den luna di yüni, mientras 161 produkto a bira mas barata i 65 produkto a keda mésun kos.