Joop Rauwers a yega Boneiru djaluna atardi 

KRALENDIJK – Joop Rauwers, di 80 aña, a yega Boneiru 10 di yüni. E èks-doño di Buddy Watersport, ku despues a haña e nòmber Buddy Dive Resort, a efektuá un buelo impreshonante di Alemania pa Boneiru. Riba 31 di mei el a sali ku tres amigu den un ‘turboprop’. Via diferente pais Rauwers a yega Boneiru ayera.

Via Münster (Alemania) e delegashon a sali pa Eskosia. Via Irlanda, IJsland, Groenland, Kánada, Alaska, New York, Hilton Head, Winterhaven, Turks & Caicos, Sint-Maarten e biahe a sigui pa Guadeloupe. For di aki  nan a sali pa Boneiru.

“Un biahe spesial”, segun e yu muhé Debby Rauwers ku a keda Hulanda. “E grupo mester a buska por ehèmpel ekipo di buseo na Eskosia. Esakinan ta nesesario pa bula riba Groenland. Durante un eventual aterisahe di emergensia nan por uza esakinan”.

Buddy Watersport

Joop Rauwers ta fundadó di un di e resortnan mas grandi na Boneiru. Na ana 1980 el a kuminsá ku Buddy Watersport. Na aña 1987 a kambia e nòmber pa Buddy Dive Resort. Na aña 2002 el a bende su empresa. Rauwers ta biba ainda na Boneiru. Bo ta top’é algun luna pa aña akinan.

,,Joop i su amigunan ta keda Boneiru tres dia”, segun e yu muhé Rauwers. “Despues di aki nan ta bai bèk direkshon di Alemania. Mi no ta na altura kon e biahe aki ta bai presis. Ku e ‘turboprop’ nan por bula maksimalmente 4 ora i mei. Mi sa ku nan ta bula via Panama i Groenland atrobe. Ora di bini akinan nan no por a ègt bishitá Groenland. Wer tabata malu. Ora di bai Alemania bèk nan ta bai hasi un rekorido di bayena einan”.