ORANJESTAD – Èks-minister Paul Croes a presentá antayera mainta na Correctional Institution Aruba KIA. E mester sinta un kastigu di prizòn di tres aña konforme e veredikto di korte den apelashon. Korte Supremo a mantené e veredikto aki djamars 7 di febrüari.

A sentensiá e èks-minister pa motibu di soborno atministrativo, labamentu di plaka, maluso di su funshon, empleo ilegal i partisipashon na un organisashon kriminal.

Segun 24ora.com ora el a drenta prizòn Croes a bisa ku e ta karga su responsabilidat ku un mente i kurason trankil.

Croes a bisa di lo uza e periodo den KIA pa konsentrá su mes riba asuntunan positivo den e periodo difísil aki.

Prokuradó General

E kaso di kasashon tabata trata spesialmente e echo ku e defensa tabata di opinion ku ta solamente fiskalnan a persiguí Croes, sin ku prokuradó general a konsedé e fiskalnan aki e outoridat.

Ora ta trata persekushon di un minister ta reglá pa lei ku ta e hefe mas grandi di Ministerio Públiko mester entamá esaki. E na su turno por delegá esaki pa fiskalnan.