KRALENDIJK – E promé speed meet ku Plenchi di Trabou, BONHATA i TCB a organisá djaweps último pa konektá buskadónan di trabou lokal ku dunadónan di trabou den sektor di turismo, tabata un éksito. No ménos ku 22 dunadó di trabou a sera konosí ku buskadó di trabou lokal na Jong Bonaire.

E buskadó di trabou por a adaptá su CV, prent esaki na e sitio mes i den korto tempu hiba vários kombersashon. Hotèl, resort, skol di buseo i lugánan di hóreka a tuma 6 kandidato mesora durante e speed meet den servisio. Nan a traha 37  sita pa un siguiente kombersashon, algun dia kaminda bo ta sera konosí ku e trabou i treinen.

Susan Willems, mènedjer di Plenchi di Trabou: “Ku e speed meet aki nos a hasi e promé paso pa kumpli ku e nesesidat agudo pa personal den e sektor di turismo i pa mehorá e oportunidat di buskadónan di trabou riba e isla.”

Buskadónan di trabou ku no a alkansá pa bai e speed meet ‘Ban traha den Turismo’, por mèldu nan mes ainda na Plenchi di Trabou.