ORANJESTAD – Kolaborashon entre Fundacion Telefon pa Hubentud Aruba i e ministerio di Salubridat Públiko, Bienestar i Deporte (VWS) pa loke ta trata telefòn pa hubentut ‘Guana Chat’ na Hulanda Karibense ta un realidat. 

Sekretario di estado Maarten van Ooijen di VWS i direktor James Sneek di telefòn pa hubentut di Aruba riba 25 di yüni a firma un akuerdo di kolaborashon pa ekspandé e servisionan di telefòn pa hubentut di Aruba pa duna servisio na Sint Eustatius, Saba i Boneiru.

For di 16 di mart muchanan di Sint Eustatius por yama ku Guana Chat na 918. Guana Chat ta nòmber di e telefòn pa hubentut di Hulanda Karibense. Entrante 27 di yüni, Saba tambe ta konektá riba e number 918 i mas despues den e aña aki Boneiru ta na turno. Via di liña di telefòn spesial hóbennan diariamente, entre 2’or di mèrdia pa 6’or di atardi, por yama grátis i anónimo ku boluntario di telefòn pa hubentut di Aruba.

Telefòn pa hubentut di Aruba pa mas ku 20 aña ta duna asistensia, konseho i informashon via di telefòn i internèt na hóbennan na Aruba di entre 8 pa 24 aña. E ekspanshon di su servisio pa e islanan di Hulanda Karibense ta un desaroyo importante pa e hóbennan. James Sneek: “E telefòn pa hubentut tei pa tur mucha ku mester di un orea pa skuch’é: ‘Ku telefòn pa hubentut por papia tokante di TUR kos’. Semper bo por puntra pa ayudo i/òf semper bo por kompartí bo storia.”

VWS ta responsabel pa entregá material di komunikashon manera e wèpsait www.GuanaChat918.com, ‘calling cards’ pa tur mucha ku ta bai skol i material di promoshon. Sekretario di estado Van Ooijen: “Hopi bon notisia ku awor mucha na Hulanda Karibense por komuniká ku telefòn pa hubentut Guana Chat ku tur loke ta preokup’é. Mi ta spera ku mas rápido posibel esaki bira e kos mas normal na mundu pa mucha i hóben tuma kontakto. Ku pregunta urgente òf simplemente pa papia si tin nesesidat di esei. Pa esaki tin biaha nos tur tin nesesidat di dje pa nos sinti nos mes bon ku nos mes.”

For di dia 27 di yüni, e number di telefòn grátis 918 lo ta alkansabel tur dia entre 2 or di mèrdia i 6 or di atardi. E wèpsait www.guanachat918.com ta duna informashon tokante uso di e liña di ayudo i diferente tópiko ku mucha i hóben ke papia di dje. Riba 27 di yüni, e tim di apoyo sosial di entidat públiko di Saba i organisashonnan di asistensia konserní lo bishitá e klasnan di grupo 2 pa 6 di e skolnan primario na Saba pa informá e alumnonan tokante e liña di ayudo aki i duna guia tokante e wèpsait.   

Ademas, lo pone un kiosko di informashon entre 11 or di mainta i 2 or di atardi, na e plenchi di parker dilanti di Bizzy B na Windwardside, unda lo duna informashon na abitante. E abitantenan lo haña e informashon online tambe, riba video i mensahe. E departamento di media lo asistí ku e parti aki.

E liña di ayudo Guana Chat ta un kolaborashon entre ministerio di Salubridat Públiko, Bienestar i Deporte (VWS) i ministerio di Asuntunan Interno i Relashonnan den Reino (BZK), Telefòn pa hubentut di Aruba, ‘Telefon pa Hubentud’ i Entidatnan Públiko Saba, Sint Eustatius i Boneiru.