KRALENDIJK—Djabièrnè 12 di aprel, tabatin un eksposishon di arte na Kolegio Emmy Schermer, esaki despues ku a finalisá un temporada di e proyekto piloto. 

For di luna di febrüari 2024 te fin di luna di mart, muchanan di Kolegio Emmy Schermer (KES) a siguí e trayekto piloto di Edukashon Kultural Artístiko di Kalidat. KES a skohe 4 diferente proyekto kaminda tur mucha a partisipá ku hopi entusiasmo. Ta trata di Arte, lès di toka Kuarta, Drama i Fotografia. 

Diesdos di aprel a klousurá e temporada, ku un eksibishon di Arte, kaminda ku mayornan i invitadonan por a pasa i wak kiko tur e muchanan a hasi. Tabata un momentu hopi bunita pa mira kon e muchanan mes tabata splika kiko tur i kon nan a hasi e tareanan di arte. Lès di Kuarta tambe tabata un di nan, hopi gustá i den un tempu kòrtiku,  muchanan a siña i asta nan por a toka un parti di kantika Krioyo i tambe kantikanan di mucha di ántes. 

Den lunanan binidero, e muchanan ta sigui partisipá na mas di e trayektonan akí, algu ku muchanan di KES a gusta mashá. Kada hende ta diferente. No ta tur mucha pa un òf otro manera, ta siña bon na skol òf komprondé e materia rápido. Sigur siña na skol ta importante pa futuro di e hende engeneral.