KRALENDIJK – Na e kompania Selibon un grupo di 12 persona a kaba otro kurso. Ta trata aki di un kurso “Kon pa atendé ku shushi i restonan kímiko.” 

Peter van Gelder, un eksperto riba tereno di seguridat i maneho di supstansianan peligroso, a organisá e kurso ku a dura tres dia. “Esaki ta hopi bon pa Boneiru. E trahadónan sa kon pa atendé ku sierto supstansianan di tal forma ku ta redusí e daño na medio ambiente”, Van Gelder ta sigurá.  E dosente aki tabata sumamente impreshoná ku Selibon i pa ku e estado di e edifisionan di e kompania. Segun e, tur kos tabata optimal. Praktikamente manera mester ta. 

Siña hopi

E úniko dama den e grupo di kursista, Valeska Frinidat, e pasa e èksamen komo e mihó di e grupo. “Mi a siña hopi kos nobo, kos ku mi no tabata sa mes. Mi ta hopi kontentu pasombra mi ta sinti ku mi ta bai dilanti. Kada un kurso ta un motivashon pa un trahadó”, e ta bisa. Frinidat tin 17 aña ta laborá na e kompania. “Di ántes pa aworakí, tin un progreso grandi na Selibon”, e ta bisa ku orguyo.