KRALENDIJK- Despues ku mas trempan den siman aki, a sali notisianan den prensa ku Stinapa lo a imponé un but basta konsiderabel na Chogoo Resort. 

E but tin di haber ku violashon di reglanan pa ku protekshon di naturalesa, pa ta mas eksakto, a importá santu di Guyana Franses i a kuminsá plama esaki riba e bich di e resort, pero sin ku ta disponé di e permitnan nesesario. Tambe no a tuma sierto prekoushon, pa evitá daño na e ref den e área di hotèl. 

Ounke Kolegio Ehekutivo ta bisa di ta para para tras di e desishon akí, mester konstatá i atmití na otro banda, ku e proseso dentro di e aparto di gobièrnu mes, tampoko no a kana optimal. 

Pa e motibu akí gezaghèber i diputado Kroon a konsultá ku gerensia di Chogogo. Na e konsulta akí representantenan di Direktorado di Supervishon i Mantenshon di Lei i Direktorado di Planifikashon i Desaroyo tambe tabata presente, pa papia tokante e situashon ku a surgi relashoná ku e trabounan na e sitio di konstrukshon, pa kua no a finalisá e petishon pa pèrmit ainda.

Eksigensia

Entidat Públiko di su banda un biaha mas a ripití e eksigensianan na gerensia di Chogogo Beach Resort ku nan mester kumpli kuné. Esaki ta nifiká ku mester adaptá e petishon pa pèrmit aktual i mester hasi petishon pa pèrmit(nan) nobo.

Si nan kumpli ku esaki Entidat Públiko Boneiru lo hasi esfuerso pa trata e petishonnan pa pèrmit. Esaki ta resultado di e konsulta entre e partidonan enbolbí.

‘Nos a hasi palabrashonnan bon kla tokante e kondishonnan bou di kua por kontinuá ku e trabounan. Si Chogogo Resort tene su mes na e kondishonnan, e ora ei Entidat Públiko Boneiru tambe lo hasi esfuerso pa sòru pa loke mester sosodé di nos banda, lo tuma lugá na tempu tambe. Boneiru i Chogogo Resort tin un interes komun i esei ta ofresé e wéspetnan ku nos ta ferwagt un plasentero vakashon na nos isla’, asina gezaghèber Rijna a bisa.

Kontentu

Hans Schellevis a bisa di ta kontentu ku e palabrashonnan hasí. ‘Nos ta kontentu ku resultado di e konsulta i ku e posishon ku enfoke riba solushon di parti di gobièrnu. Naturalmente serka nos tambe protekshon di naturalesa i en partikular e refnan di koral ta na promé lugá, pasobra ta pa eseinan nos wéspetnan ta bini’, asina Schellevis a bisa.