WILLEMSTAD – Segun e matutino Èxtra JetAir a haña un solushon pa e bankarota resien. Despues di e anunsio di e bankarota siman pasá, JetAir, tambe konosí komo United Caribbean Airlines BV, lo mester a reaktivá bou di un doño nobo. Esaki ta nifiká ku e kompania di aviashon lo por bai reanudá su operashonnan.

Ayera e ofisina di abogado HBN Law & Tax a manda un karta pa minister di Desaroyo Ekonómiko pa inform’é di e reaktivashon.

Djabièrnè último e atministradó hudisial a hiba kòmbersashon ku entre otro promé minister i minister di Hustisia. Durante e kòmbersashonnan aki a diskutí e importansia di JetAir pa Kòrsou. JetAir ta krusial pa kupo di trabou, turismo i e konekshon den region, spesialmente pa e islanan ABC. Gobièrnu i e atministradó hudisial ta di akuerdo ku un reaktivashon ta pa interes general.

Èxtra ta informá ku mas ku un kandidato a presentá nan mes pa tuma JetAir over. E siman benidero kòmbersashonnan ta tuma lugá ku e kandidatonan aki. Despues e atministradó hudisial lo krea un asina yamá bid book, kaminda tin pon’é e regla- i proseduranan pa e proseso di benta.  

Manera ta usual ku bankarotanan, lo bende JetAir as is where is i sin garantia. E partido ku ta kumpli ku tur kriteria i ku ta hasi e mihó oferta, ta haña e chèns pa kontinuá ku JetAir despues di aprobashon di wes komisario.

Den e mésun karta e atministradó hudisial ta pidi gobièrnu i e direktor di SVB pa bai di akuerdo pa eliminá e bankarota. Si tur kreditor bai di akuerdo ku esaki, wes lo dikta ku tur probabilidat ku e proseso ta hustifiká i por lanta e bankarota. Despues e atministradó hudisial ta pasa e aktiva i pèrmitnan pa e operadó nobo, di moda ku JetAir por bira operashonal atrobe na Kòrsou.