KRALENDIJK – Fundashon Lesa Dushi  ( FLTD) ta bai organisá pa promé biaha:  kompetensia di deletrá den idioma Papiamentu pa studiantenan di klas 1 di  VMBO,  Kader-mavo, mavo, havo i vwo na Bonaire.

E kompetensia ta tuma lugá  dia 2 di desèmber 2023, entre  6 or  pa 8 or di anochi  na Liseo Boneriano.

Pa dies aña kaba FLTD ta organisá e kompetensia akí  den idioma hulandes. E aña akí  FLTD ta kuminsá  pa promé biaha  ku e kompetensia den idioma papiamentu. Otro aña FLTD lo sigui ku  e programa kalendario ku e kompetensia di diletrá  den idioma hulandes.  FLTD su  intenshon ta pa den futuro  amplia e kompetensia akí den idioma ingles i spañó.

Meta di e kompetensia akí ta pa duna e nos muchanan oportunidat pa nan praktiká i mehorá nan abilidat di papia i skirbi tur idioma instruí na Bonaire korektamente.

Pa yuda nan prepará pa e kompetensia di deletrá na Papiamentu, kada partisipante ku inskribí lo risibí un lista di 150 palabra ku nan mester  por skirbi i  deletrá. E palabranan lo kubri un variedat di nivel di difikultat pa stimulá nan deseo di konosé  idioma Papiamentu bou di diferente aspekto.

Ta un oportunidat úniko pa nan  demostrá nan abilidat i  konosementu di  idioma papiamentu i pa disfrutá di un aktividat ku nan por dibertí alabes ta edukativo.

Na e kompetensia akí ta bai tin  premionan atraktivo. Pa menshoná algun: trofeo, pakete di buki, regalo . tambe kada partisipante lo risibí medaya di partisipashon i  un sertifikado komo rekuerdo.

Pa inskribí ta masha fásil: Djis aserká bo dosente di idioma Papiamentu na bo skol  i bisé ku bo tambe kier partisipá. Of manda un mail na [email protected] ku bo nòmber, fam, skol i klas. I lo bo risibí tur sobrá informashon i preparashon.