KRALENDIJK – Despues di hopi kritika for di tur literalmente tur sektor di komunidat Boneriano, direktiva di Fundashon Mariadal finalmente a mustra di ta dispuesto pa akseptá invitashon di Konseho Insular pa bin duna splikashon tokante e maneho hibá dor di e organisashon. Esaki Mariadal ta skibi den un karta ku nan a saka djabjièrnè atardi.

“Konseho Insular di Entidat Publiko Boneiru a invitá direktiva di Fundashon Mariadal pa un reunion informativo tokante, entre otro kos, e buelonan di ambulans. Ounke Mariadal ta un fundashon privá di kuido ku tin un relashon kontraktual ku Ministerio di VWS (ZJCN) pa kompra di kuido, e direktiva di Fundashon Mariadal ta komprendé e importansia ku e Konseho Insular ta pone riba informashon direkte,” segun e komunika di prensa.

Fecha

Mariadal ta bisa ku direktiva di e fundashon awor ta sperando un proposishon konkreto pa fecha ku e reunion lo por tuma lugá.