KRALENDIJK – Fundashon Tienda pa Konsumidó Boneriano (FTPKB) a ekspresá satisfakshon ku e kolaborashon nobo ku Bondigro, ku a bira posibel despues di e supermerkado a kambia di doño.

“Antes Bondigro tabata duda hopi pa partisipa den komparashon di preis, pero awor por papia di un kolaborashon nobo ku ta benefisiá konsumidó di Boneiru,” segun FTPKB a skibi djarason. E organisashon ta mustra tambe ku awor, Bondigro konsistentemente ta entre e tòp tres di supermerkado na Boneiru ku ta ofresé e produkto mas bará di e makutu básiko.

FTPKB ta tambe nota ku e supermerkado a tuma e inisiativa pa indiká mas klaramente artíkulo ku ta mas barata. Ademas, Bondigro a mehorá nan surtido di produkto i eksperensia di compras. Esaki ta inkluí un oferta di mas produkto pa kas, na preis mas ekonómiko i un parti friu ku a ekspandé konsiderabelmente. 

Kolaborashon

FTPKB ta bisa k unan ta apresiá pa e koperashon i mehorashonnan, i ta wak dilanit pa un kontinuashon di e kolaborashon positivo.