KRALENDIJK- Fundashon Wega di Number Boneiru’, ta bai selebrá 30 aniversario durante e temporada binidero. Esaki ta loke Anne Marie Mercera, a bisa durante un enkuentro ku prensa djabièrnè anochi. 

Ta bai tin diferente aktividat i premio pa komunidat. E premio grandi ta un outo marka Nissan Kicks 2022. Pa partisipá mester kumpra number. Nan ta bai tambe ku BonDoet e aña aki. 11 di yüni ta organisá un aktividat kultural virtual i riba e fecha ta saka ganadó di e outo nobo, un Nissan Kicks. 

Lo tin un aktividat di Pony Lique i ‘Bonaire Wolf pack Baseball Foundation’ ta organisá esaki. E torneo ta kuminsá na luna di yüni i tèrminá na yüli. A menshoná tambe ku ta bai forma un direktiva nobo pa FWNB. 

Kambio

Diputado James Kroon tabata presente i el a bisa e ta kontentu ku e FWNB i ta bai tin kambio den e organisashon, sinembargo e meta si ta keda manera ta e kaso awor, esta duna bèk e ganashi na komunidat. Durante e anochi a presentá e logo nobo di FWNB.