KRALENDIJK- Gobiernu di Boneiru no por indiká bon ainda kiko nan nivel di ambishon ta, pa loke ta ta trata servisio ku ta dunando na siudadanonan di e isla. 

Esaki tabata kontesta di diputadonan Anjelica Cicilia i Clark Abraham riba djaweps durante preguntanan di prensa tokante kuantu aprobashon di permit di konstrukshon ku gobièrnu lokal ta aspirá.  

Aktualmente, aprobashon di un permit di konstrukshon ta tuma entre kuater i seis luna, kual hopi hende riba e isla ta eksperenshá komo hopi largu. Cicilia a admití ku OLB a kai atras den e último añanan i nan ta trahando pa koregí esaki. “Awor no por nos indiká ainda kon lihé esaki por ta posibel den futuru” segun Cicilia a splika. 

Diputado Abraham ta mira e pregunta den un perspektiva mas amplio, inkluso tur interakshon di gobièrnu ku klientenan. “E Kolegio Ehekutivo aki ta mira ku den e último aña e invershon den e medionan nesesario a keda atras. Tin biaha tambe tin problema ku falta di sufisiente empleado”, Abraham a remarká. 

Cicilia i Abraham a menshoná tambe ku mester hasi un mihó análisis di e tipo di petishon. “Aktualmente, e proseso pa duna un permit di konstrukshon pa traha algu na un kas eksistente, ta tuma mes tantu tempu ku e petishon pa konstrukshon di un resort grandi. Esaki no ta lógiko.” Petishon ménos kompliká mester wòrdu tratá mas lihé ku petishon mas kompliká. 

Pasenshi

Abraham ta pidi pa pasenshi di e siudadano, relashoná ku mehorashonnan ku ta wòrdu implementá. “Kolegio Ehektivo ta konvensí ku mester mehorashon. Sinembargo, esaki tambe ta un probleman ku a krese den transkurso di aña. P’esei mi ta pidi pasenshi pa mehorá e servisio na suidadano. Na e momento ku nos por hasi promesanan konkreto tokante esaki, nos sigur lo komuniká esaki,” Abraham a primintí.