Kralendijk- Gobièrno di Boneiru ta kontemplando pa instalá reflektor riba e kaminda entre Playa i Rincon. Esaki direktor Roy Martina di direktorado Espasio i Desaroyo a bisa den un rueda di prensa djabièrne atardi.

Martina a hasi su remarke riba un kontesta di AworBonaire.nu riba e falta di un linea riba e kaminda, ku ta hasi e kaminda difisil pa manehá parti anochi.

“E situashon tin nos atenshon”, asina Martina a bisa. Sinembargo, e direktor a indiká tambe ku fèrf hopi biaha no ta bon pa nos klima. “Si solo ta seka e fèrf bo ta keda ku un puiru riba kaminda, anto bo mester kuminsá ful di nobo” Martina a splika. E bentaha di reflektor, ku hopi biaha ta wòrdu indika komo ‘wowo di pushi’ tin e bentaha ku nan ta refleha lus fuertemente ora nan mes ku lus. Esaki tin e bentaha di por guia e outomobilista bon riba un kaminda skur.

Atenshon

Segun Martina e refklektornan tin un otro bentaha i esaki ta ku nan ta alertá e outomobilista ku sonido i vibrashon, na momento ku esaki ta kita for di riba su banda di kaminda.

Ounke no por a duna un fecha konkreto ainda pa un solushon, e direktor a bisa ku ta studiando vários alternative pa hasi e kaminda mas seif. “Nos sa tambe ku e kapa di a kaminda ta den masha mal estado. Pero nos ta mirando si nos por bin ku e mehorashon aki, sin mester warda riba drechamentu di hinter e kaminda pa e no mester dura muchu largu”, asina Martina a splika.