Kralendijk, Boneiru – Entidat Públiko Boneiru i Kámara di Komèrsio Boneiru ta lansa un enkuesta pa yuda evaluá, midi i analisá e konsekuensianan negativo di e krísis di COVID-19 pa empresanan.

Ta bai usa e enkuesta aki pa un ‘Evaluashon Di Nesesidat Despues Di Desaster’ (Post-Disaster Needs Assessment – PDNA) mas amplio, den kua ta deskribí e konsekuensianan sosial i ekonómiko di e pandemia pa Boneiru i den kua ta duna guia mas aleu na fitbèk i planifikashon di rekuperashon di gobièrnu.

Na aña 2020 gobièrnu di Boneiru a aserká Banko Mundial pa sosten tékniko relashoná ku ehekushon di e PDNA. Komo aporte importante na e PDNA e enkuesta lo enfoká riba un variedat di tópiko, manera desafionan riba tereno di desaroyo di empresa, limitashonnan operashonal i aksesibilidat na medionan.  E ‘Technical Assistance (TA) Program for Disaster Risk Financing and Insurance’ den Paisnan i Teritorionan Ultramar (PTU-nan) Karibense finansiá pa Union Oropeo i ku ta bou di maneho di Global Facility for Disaster Reduction and Recovery (GFDRR), lo finansiá e trabou. E ‘Technical Assistance (TA) Program aki ta forma parti di e programa regional  di Elastisidat, Energia Sostenibel i Biodiversidat Marino (Resilience, Sustainable Energy and Marine Biodiversity Program  – RESEMBID) di e PTU-nan Karibense  ku ta kubri tur e 12 PTU-nan (un suma total di  42,67 mion EURO pa e periodo di 2018-2023).  

Enkuesta

For di 16 te ku 26 di mart 2021 Kámara di Komèrsio Boneiru pa medio di ‘direct mailing’ lo sòru pa tur empresario na Boneiru haña e enkuesta. E enkuesta ta aksesibel via e wèpsaitnan di Kámara di Komèrsio Boneiru i Entidat Públiko Boneiru. Tur kontesta den e enkuesta ta konfidensial i ta tene nan privá. Ta presentá e resultadonan i  konklushonnan general tokante impakto di COVID-19 riba mundu empresarial den e PDNA i riba wèpsait di e organisashonnan afiliá. Lo presentá resultadonan di e enkuesta tambe na e ministerionan relevante na Den Haag pa enfatisá e nesesidat pa medidanan ekonómiko mas amplio i integral.

‘Komo isla ta importante pa nos bai un paso mas aleu i na un manera proaktivo akumulá informashon tokante e hopi desafionan ku mundu empresarial boneriano ta konfrontá durante e krísis persistente di COVID-19’, segun sr Hennyson Thielman, diputado di Ekonomia, Turismo i Finansa den Kolegio Ehekutivo di Boneiru.

Union Europeo

Embahador Fernando Ponz Cantó, kende ta na kabes di e delegashon di Union Oropeo na Guyana i Sürnam i alabes ta responsabel pa e PTU-nan hulandes Aruba, Bonaire, Curaçao, Saba, Sint Eustatius, Sint Maarten i tambe St. Barthélemy a añadí: ‘Union Oropeo ta sigui sostené Boneiru den su intentonan pa reakshoná adekuadamente riba e efektonan negativo di e krísis di COVID-19, pa medio di e programa di RESEMBID ku Union Oropeo ta finansiá, i ta kontentu ku lansamentu di e enkuesta aki ku lo enfoká riba e konsekuensianan sosial ekonómiko di COVID-19’.

Gobièrnu di Boneiru ta enkurashá tur empresa for di tur ramo empresarial pa yena e enkuesta pa haña un imágen kompleto di e hopi efektonan sosial ekonómiko di COVID-19. Pa fasilitá e  mundu empresarial diverso di Boneiru, e enkuesta ta disponibel den kuater idioma: hulandes, papiamentu, spañó i ingles. Pa motibu di limitashonnan di e plataforma di enkuesta, por haña e vershon na papiamentu bou di titulo “Portugees”.

Traha huntu

E organisashonnan ku ta traha huntu – Entidat Públiko Boneiru, Kámara di Komèrsio Boneiru i Banko Mundial – pa promé biaha ta traha huntu pa ehekutá e investigashon hopi importante i kontemporáneo aki. Gustosamente e organisashonnan ta hasi uso di nan konosementu kolektivo pa generá ideanan práktiko i útil tokante e krísis di COVID-19.

E enkuesta aki ta sigui den pasonan di un enkuesta anterior ku Kámara di Komèrsio a ehekutá, pa medio di konsentrá su mes riba preguntanan mas amplio ku den sifra ta determiná e impakto finansiero di COVID-19 riba empresanan di Boneiru.   

---

Lesa tambe:

• 
  Thuersten Winklaar ta bringa pa e título di Kampion Hulandes na Den Haag
• 
  Prevení Zika, Dengue i Chikungunya
• 
  Zulay Nahr ta kompartí alegria di Pasku ku famianan den nesesidat na Boneiru 
• 
  Winair i KLM reintrodusí akuerdo di kódigo kompartí
• 
  Komishon Herensia Kultural ke protekshon pa identidat di Dia di Rincon