KRALENDIJK – E grupo di preshon kontra impuesto haltu di aeropuerto, Airport Tax Busters Bonaire (ATBB), ta hasi un apelashon riba e aeropuertonan ku ta traha huntu den e Dutch Caribbean Cooperation of Airports (DCCA) pa tuma akshon for di awor, pa sòru pa un mihó konektividat entre e islanan i preisnan di pasashi mas rasonabel.  

ATBB ta remarká den nan karta, dirigí na presidente di DCCA Joost Meijs di Aeropuerto Reina Beatrix na Aruba, ku e esfuersonan di e aliansa di kolaborashon ta parse di ta enfoká riba desaroyonan den  futuro lehano i spesífikamente buelona eléktriko. Aunque ATBB ta deskribí e esfuersonan di DCCA komo positivo, e grupo di preshon ta splika ku ta importante tambe pa traha riba e puntonan ku ta stroba pasaheronan awor, i partikularmente gastunan eksisivo na impuesto. 

“Nos kier ekspresá nos profundo preokupashon tokante e aparente falta di esfuerso di parti di DCCA pa solushoná e kondishonnan prevalente pa pasaheronan entre nos islanan, ku enfasis spesial riba e problema di impuesto di aeropuerto ku tin biaha ta eksorbitante. ATBB ta bisa ku ta un echo sin mas ku prinsipalmente residentenan di Boneiru, St. Eustatius i Saba ta dependé kasi totalmente riba aeropuertonan di tránsito, spesialmente Kòrsou i St. Maarten, pa kue un buelo di konekshon.”

ATBB ta remarká ku residentenan di e tres islanan BES ta wòrdu kastigá di dos manera: No solamente mester kumpra un pasashi adishonal pa yega Kòrsou òf St. Maarten, pero tambe nan ta wòrdu konfrontá tambe pa dos biaha e impuesto. 

68 dòler adishonal

Resientemente, ATBB a mustra ku pasaheronan ku ta sigui biaha ku avianan manera COPA, Avianca i Surinam Airways via Kòrsou mester paga $68 èkstra di impuesto di aeropuerto, mientras ku realmente esaki lo mester ta un tarifa spesial di tránsito di $15.

Lasonan familiar i di amistat ta hunga un ròl importante na nos islanan, manera e aeropuertonan sa mihó ku ningun otro instancia. “Tin lasonan familiar profundo entre habitante di e islanan ABC i SSS, ku ta kondusí na biahenan frequente pa eventonan sosial i familiar, manera kasamentu i entiero. Ta desalentador pa mira ku den kaso nan spesífiko, manera e ruta entre Kòrsou i Aruba, belasting di aeropuerto ta konstituí un terfer di e gastunan total di pasashi.”