KRALENDIJK- Havenmeester Günther Flanegin ta desmenti ku presensia di hopi barku krusero aktualmente ta e motibu dikon supermerkadonan na Boneiru tin problema ku transporte di produkto pa Boneiru pa yena nan rèki. 

Sí Flanegin ta nota ku tin hopi reto na nivel mundial na e momento aki, ora ta trata di transporte i konteiner. “E dos barkunan ku normalmente ta trese produkto direkto for di Europa, aktualmente por gana mucha mas riba otro rutanan mundial, ku riba e ruta pa e islanan aki. Nan mes ta hasi nan eskoho den esaki”, asina Flanegin ta bisa. E ta desmentí ku aglomerashon di barkunan krusero tin algu di haber ku esaki. 

Drùk

Flanegin na otro banda no ta desmentí ku haf di Boneiru ta basta drùk. “Nos tin hopi moveshon den haf aktualmente, pero tambe pa otro motibu. Tur hende sa ku tin hopi konstrukshon ta tumando lugó na Boneiru i esaki ta rekerí entre otro hopi santu i semènt. Tur esakinan mester yega via di nos haf”.

Segun Flanegin en general no tin problema aktualmente pa lòs karga ku ta yega Boneiru via Don Andres. “Ta pa esaki a drech i waf mei mei anto en general Don Andres por mara einan sin problema”. Flanegin ta bisa ku en general tin un kontakto i komunikashon hopi bon ku e diferente agentenan di e barkunan ku ta bin Boneiru direkt for di Europa. “Huntu nos ta kombersá i wak kon nos por hinka tur kos den otro i esaki en general, ta bayendo basta ‘smooth’, asina Flanegin a splika.