WILLEMSTAD – E hòmber, ku su propio outo a alkans’é djabièrnè, a muri a konsekuensia di e leshonnan ku el a risibí. Ta trata di e Yu di Kòrsou Humphrey Privania di 70 aña, nasé 21 di sèptèmber 1952.

Djabièrnè mèrdia e hòmber a yega kas i a baha for di su outo pa habri porta di kurá. El a lubidá sinembargo di hala e brek di man, di moda ku e outo a kuminsá kore i alkans’é. E porta a kibra i finalmente e outo a bai para kontra di un muraya.

A hiba Privania ku urgensia CMC kaminda djadumingu el a fayesé a konsekuensia di e leshonnan risibí. E ta e di bintitres viktima mortal den tráfiko na Kòrsou e aña aki.