Willemstad/Kralendijk- Tin basta interogante ainda ku ta rondoná e benta di Banco di Caribe dor di Banko sentral di Kòrsou i St. Maarten (CBCS).

Djaweps CBCS den un relato pa prensa a komuniká ku lo bende Banco di Caribe ku e grupo United Holding di mionario Gregory Elias. E relato di CBCS ta enfatisá ku e filialnan di Banco di Caribe na Bonaire, Aruba i St. Maarten ta forma part di e benta. CBCS ke bende Banco di Caribe pa rekuperá kapital ku e kompania madre di e banko, Ennia Caribe, a saka for di e empresa den transkurso di añanan tras di lomba. A base di esaki CBCS a pone Ennia Caribe den su totalidat bou di kuratela i ta hasiendo tur esfuerso pa rekuperá e fondonan ku doño Hushan Ansari i su famianan a saka for di Ennia.

Banko Sentral di Aruba (CBA) ayera mesora a emití su propio relato di prensa, mustrando ku e benta di e filial na Aruba por tuma solmante luga si nan, esta CBA, tambe ta bai di akeurdo ku esaki. Ta dekonosí te asina leu, si De Nederlandsche Bank (DNB) tambe lo mester duna su aprobashon, ya bankonan na e islanan BES -al menos parsialmente- ta kai bou di DNB i Autoriteit Financiële Markten (AFM).

Prèis

Un otro echo ku ta wòrdu komentá hopi, voral na Kòrsou ta e prèis pa kual a bende e banko. Segun e matutino Vigilante lo a bende Banco di Caribe pa un suma di masomenos 60 mion florin, ku ta wòrdu mirá komo un prèis hopi abou mirando ku ta trata di un banko ku konsistentemente ta hasiendo ganashi.