BRUSELAS – Korte di hustisia di Bruselas a sentensiá djamars un Hulandes di 48 aña na un kastigu di prizòn di sinkuenta luna pasobra a atrap’é tresiendo droga di kontrabanda for di Kòrsou.

Ta por lo ménos di seis biaha ku e hòmber ta kometé tipo di aktonan asina. A konden’é sinku biaha kaba pa aktonan similar.

E persona aki a yega Aeropuerto di Bruselas riba 20 di ougùstùs ku un buelo for di Kòrsou. Ora duana a puntr’é ku e tin droga kuné, el a kontestá ku nò, pero no a dura mucha ku a resultá ku esei tabata un mentira.

Un CT-scan den e hospital na Jette a mustra ku e homber a guli 108 bolita di kokaina, ku huntu tin un peso di 1,75 kilo.

“A sentensiá mener kaba kuater biaha na Hulanda pa trafikashon di droga i un biaha na Fransia”, segun ofisina di fiskal. “Ta ópvio ku e no ta siña su lès. Solamente un kastigu di prizòn severo ta na su lugá aki.”

Shete yu

“Mi kliente tabatin un debe di 30.000 euro despues di un aksidente di tráfiko i mester kria shete yu”, por a tende di parti di defensa.

“A bis’é ku lo kanselá su debenan si e hasi e transporte aki. Mi ta pidi un kastigu leve, mi kliente tin perspektiva di trabou ora e sali for di prizòn.”

Korte a tene kuenta ku e sinku kondenanan anterior i no a mira ningun motibu pa ta leve.