ORANJESTAD- Mundialmente ta selebrá yüni komo Luna di Orguyo pa komunidat LGBT+. E selebrashon anual ta konmemorá e Stonewall Riots ku ta marka e komienso di e movemento internashonal pa derechonan igual pa esnan ku ta forma parti di un minoria seksual inkluyendo lesbiana, gay, biseksual, transgénero etc. Igualdat hurídiko i di oportunidat pa esnan LGBT+ ta un derecho humano  den maioria di paisnan avansa. 

Aruba su mesun movementu di igualdat pa esnan LGBT+ a kuminsá na 2006 ku e kaso Oduber-Lammers, un pareha lesbiana Arubana-Hulandes kasa na Hulanda, ku a tuma acshon legal pa por registra nan matrimonio lokalmente. Na 2007 hues a dicta ku Censo/Registro Sivil lo mester registra e matrimonio Hulandes di e residentenan Arubano pero e viktoria a keda simbolico paso e no a otorga ningun derecho adishonal. 

Na 2016 èks-Parlamentario Desiree Croes a proponé un amienda pa introdusí union sivil (geregistreerd partnerschap) ku e mesun derechonan di matrimonio pa tanto parehanan di mesun sekso komo esnan di sekso diferente. Parlamento di Aruba, ku 11 voto na fabor, a pasa un amienda di konsenso kreando union sivil pero sin e derechonan igual na matrimonio. Aruba su Parlamento tabata e promé órgano legislativo den Caribe pa aprobá union sivil pa parehanan di mesun sekso. 

Kambio

Na 2021, Parlamento di Aruba ku 17 voto na fabor, a aprobá implementashon di kambionan den kódigo sivil (burgerlijk wetboek) di Aruba,inkluyendo introdukshon di union sivil. Desde 1 september 2021 parehanan di mesun sekso i esnan di sekso diferente por registrá un union sivil na Censo pero ámbos ta keda falta e mesun derechonan sivil ku matrimonio ta otorgá. Dia 14 di oktober 2021, pareha van der Biezen-Cordoba, a marka historia komo e promé pareha di mesun sekso pa entamá un union sivil na Aruba, selebrashon di e seremonia ofisial a tuma lugá na Stadhuis. 

Aktualmente parehanan di sekso diferente por skohe entre union sivil òf matrimonio si nan ke tur e derecho i benefisionan ku e último ta otorgá. Sinembargo, parehanan di mesun sekso ta limitá na un union inferior sin tur e derechonan di matrimonio komo úniko opshon asina ankrando diskriminashon. Benefisionan inkluyendo asuntonan fiskal (impuesto), servisionan sosial i hopi mas no ta alkansabel pa parehanan den un union sivil i herensia por unikamente wordu establesé via di un akto notarial.

Inishativa

Na yüni 2022 komo parti di selebrashonnan di Luna di Orguyo, un inishativa di lei pa habri matrimonio pa parehanan di mesun sekso lo ser presentá. E Miembronan di Parlamentu inisiador di e lei lo firma e konsepto i entregá e legislashon na Presidente di Parlamentu i Griffier. Na e momento ei e trayelto legal lo kuminsá i e konsepto lo ser mandá inmediatamente pa Raad van Advies ku lo tuma mas o ménos seis siman pa evaluá i despues duna nan rekomendashonnan. Despues, a base di e rekomendashonnan di Raad van Advies, e lei por ser modifiká i mandá bèk pa Raad van Advies pa un di dos evaluashon òf lo keda na Presidente di Parlamentu pa yama un reunion públiko pa trata e lei. 

E organisashon di hende LBGT+ na Aruba ta spera ku promé ku fin di 2022, Parlamentu di Aruba lo haña e oportunidat pa debatí riba habrimento di matrimonio pa parehanan di mesun sekso. E kambio historiko aki ta uno inkreiblemente importante pa tur e benefishonan ku e ta trece, spesialmente pa e salú físiko i mental di e komunidat LGBT+.