KRALENDIJK – Tin algun interogante importante pa loke ta trata e aktitut di e tripulashon di e avion di Sarpa ku djasabra ku a pasa a sali parsialmente for di e pista durante e despegue. 

Djarason Sarpa saka un komunikado, unda nan ta primintí ku e investigashon riba e insidente lo tu profundo i transparente. “Nos ta realisando un investigashon profundo aktualmente, den kolaborashon ku Autoridat di Aviashon Sivíl di Colombia, Dutch Safety Board – DSB, i Bonaire International Airport”.

Segun Sarpa ta skibi, e insidente a tuma lugá ora e tripulashon tabata posishoná pa kuminsá e despegue. “E avion a move un tiki pa man robes i a dañá tres lus di pista di aeropuèrto. E kapitan a koregí e situashon inmediato i a sigui ku e despegue”, segun e deklarashon di Sarpa, ku asina ta paresé komi si e ta bagatelisá seriedat di e insidente.

Kritika

Tin kritika di ekspertonan di aviashon tambe riba e aktitut di e tripulashon. “Un regla prinsipal den entrenamiento di piloto ta ku, si bo tin desorientá, bo mester abortá e despugue. Na e momento ku e lusnan di e pista tabata wordu dal, e avion tabata na un spit bastante abou ainda,  i sigur no a yega e punto krítiko (konosí den terminologia di aviashon komo V1, redakshon), unda no por a abortá e despuegue di forma responsabel”,  segun un fuente konsultá pa ABC Online Media ta splika. 

Tambe ta parsé ku e tripulashon no a reportá e insidente i a kontinuá nan buelo pa Colombia. “Dikon e tripulashon no a informá aeropuerto ku a bin dal den opheto riba pista? E momento di raportá e insidente ta importante pa e solo hecho ku, si por ehèmpel e tripulashon tabata bou di influensia di alkohòl òf otro sustansia, esaki lo no por ta detektá den e sanger despues ku hopi ora a pasa.

Situashon peligroso

Si e tripulashon di Sarpa realmente no a informá aeropuerto ku nan a kousa e aksidente, nan por a krea un situashon peligroso pa otro avion ku mester a lanta buelo despues di nan.

De hecho, e presensia di opheto, indiká komo “foreign objects”  den aviashon riba un pista por kousa un katástrofe pa un avion ku ta lanta buelo despues. E ophetonan aki por perforá e tanki di fyul, òf por wòrdu chupá pa a e motor di un avion ku ta despegá, ku tur konsekensia ku esaki por trese kun’é.

Aeronáutica Civíl

Un otro punto ku ta trese interogante ta e echo ku djaluna mainta trempan  inspektornan di e Aeronáutica Civil di Colombia a yega Boneiru, ku despues a kiminsá un investigashon. Un detaye interesante ta ku e inspektornan a ser transportá pa un avion di Sarpa mes, ku ta lanta duda riba e independensia di e inspektornan. 

Sarpa mes a informa: “Investigadónan di e autoridat Aerocivíl Colombiano a yega Bonaire djaluna mainta pa realisá e investigashon. Nan a analisá e evidensia físiko riba e pista i nan a hasi entrevista ku e personal di e aeropuèrto i e tripulashon”. 

Aki e pregunta ta bin dilanti kon utoridat di aviashon Kolombiano por ta investigando e insidente. Ounke ta trata di un kompania Colombiano, supervisá pa Aeronáutica Civil, e pregunta ta si nan ta e autoridat kompente pa realisá un investigashon di un insidente asina na un aeropuerto situá na Karibe Hulandes,  de-facto teritorio Hulandes. 

Di parti di Bonaire International Airport (BIA) i di Inspectie Leefomgeving en Transport (ILT) no a sali ningun komunikashon ainda tokante e insidente òf algun investigashon ku ta wordu realisá riba e susedido.