Esun ku kana na Schiphol for di sala di despedida te na ‘gate’, ta kana kasi 1.5 kilometer. Ku esaki e distansia na pia na Schiphol ta un di esnan mas largu di Europa, e sitio di komparashon Parkos a investigá. Asina luchtvaartnieuws.nl ta skirbi.

E sitio, ku generalmente ta kompará lugánan di stashoná outo na aeropuertonan, a kalkulá e distansia for di entrada di e sala di despedida te na e ‘gate’ di mas leu ku ayudo di Google Earth. Segun Parkos Schiphol ta na di ocho lugá riba e lista di klasifikashon Europeo.

E aeropuerto ku e distansia na pia mas largu ta Madrid-Barajas. Einan ta trata di algu mas ku 2.5 kilometer. Pero einan e pasaheronan por hasi uzo di shuttlenan grátis. E aeropuerto di Athene ta na di dos lugá ku algu ménos ku 2.5 kilometer i Charles de Gaulle na Paris ta na di tres lugá ku 2.346 meter.

Tin tambe aeropuertonan mas grandi kaminda e distansia ta mas kòrtiku. Milaan Malpensa por ehèmpel ta solamente 761 meter. Na aeropuerto di Eindhoven, e di dos aeropuerto di Hulanda,  e distansia ta 485 meter segun Parkos i na The Hague Airport na Rotterdam e ta 189 meter.