KRALENDIJK- James Finies awe mainta a entrega un karta na warda di polis relashoná ku menasa di Cliff Frans. James Finies di ‘Nos Ke Boneiru Bèk’,(NKBB) a bisa ku nan ta sinti nan hopi menasa di e persona menshoná i na vários okashon ya nan a entrega un karta na polis i no ta tende nada di e keho.

Polis a pidi James i miembronan di prensa pa alehá poko mas leu for di warda di polis mainta, momentu ku James tabata pendiente pa entrega e karta na warda di polis. Esaki a sosodé i despues ku el a entrega e karta a bai meskos.

Nada

“Hopi hende tin keho di e Cliff Frans, sinembargo nada ta sosodé. Polis tin informashon i keho, pero no ta hasiendo nada tokante e situashon. Mi tin kantidat di hende ku a trese nan kehonan p’ami i mi a entrega tur na polis. Esaki ya for di algun tempu pasá.

Finies a bisa di ta spera ku awor si polis aktua i laga tende algu. “Aktualmente tin henter un investigashon tumando lugá, tokante menasa pa medio di un fake acount riba facebook i esei si tin tur atenshon,” Finies a bisa.