KRALENDIJK- Èks diputado James Kroon a saka un komunikado, kaminda ta bisa ku Fundashon Mariadal meresé sosten di komunidat. Kroon a saka su komunikado relashoná ku diferente krítika fuerte ku e Fundashon pa maneho di kuido a risibí último tempunan aki. 

“Kritika fundá ta unu, pero mala fe i inteshon pa kibra kos ta totalmente otro kos. Pa basta tempu mi a keda ketu i mira kon diferente atakenan struktural ta keda lansá den direkshon di Fundashon Mariadal”, asina Kroon a trese dilanti.

Kroon ta mira tambe motibunan okulto tras di e atekenan aki. “Ta basta tempu tin diferente petishonnan i preshon di invershonistanan komershal na Boneiru pa kuminsá servisionan den kuido na Boneiru. Boso saka boso sòm. Naturalmente si no kibra servisio di Mariadal, anto lo no tin motibu pa otorgá pèrmit di servisionan den kuido na institutonan netamente komershal”. 

Mala fe

Segun Kroon Fundashon Mariadal pa hopi aña a traha duru pa haña kuido na Boneiru na un nivel aspetabel. Ounke ku Kroon ta atmití ku tin espasio pa mehorashon pa loke ta trata sierto aspekto den kuido, e ta mira tambe loke e ta deskribí komo ‘polítiko di mala fe’, ku lo ta sirbiendo interesnan komersial. 

“Ami, James Kroon ta duna ful mi sosten pa tantu Fundashon Maridal ku nos otro institushonnan lokal di Boneiru ku a bringa di nada pa awe nos tin miho kuido ku antes”, asina Kroon a konkluí su ekspreshon di sosten pa Mariadal.