KRALENDIJK – Segun miembro di konseho insular pa UPB, James Kroon, durante reunionnan tokante turismo, a lanta un diskushon tokante ‘ganashi di invershon’ òf tambe kiko nos turismo ta generá. 

Segun Kroon a bisa, diputado Clark Abraham di Turismo a trese dilanti ku e loke ku e isla ta mira bèk di su invershon den turismo, lo no ta sufisiente òf sufisientemente bisto. Ku e ponensia menshoná según Kroon, Abraham lo ta purba na defendé e fayo grandi ku e a kometé dor di a presupuestá solamente 2 mion pa TCB por hasi merkadeo i desaroyá aktividatnan. 

“Kisas mi persona no ta mes sabi ku nos diputado, pero di un forma simpel lo mi purba na bai trese dilanti partinan di loke e rendimentu di turismo. No muchu dia pasa e presupuesto pa 2025 a keda presentá na konseho insular pa diskutí ariba i pa despues tuma un desishon. E presupuesto ta den balansa i ta sera riba un montante total di 108.937.446 òf tambe 109 mion dòler. E presupuesto aki ta keda finansiá ku ganashi di belasting lokal di 37,7 mion i fondonan for di Hulanda ta kubri e sobra presupuesto. Di e 37,7 mion ei 14,5 mion ta di e impuesto direkto riba turista pa drenta Boneiru i 3,4 mion ta di ‘Nature Fee’. Pues 17,9 mion ku ta suma 48% di tur entrada lokal di Gobiernu  ta bini direktamente for di pòtmòni di e turista. Pa kompará ta bon pa nos menshoná ku nos tur huntu ta generá na ‘erfpacht’ plus hür di terenonan no mas ku 3,5 mion na entrada”, asina Kroon a bisa. 

Segun Kroon a sigui bisa, e sektor turístiko di Boneiru ta merkadiá i desaroyá aktividatnan ku ta generá un ganashi di 17,9 mion, pero tòg TCB ta haña solamente 2 mion pa kubri nan gastunan. 

Rendimentu haltu 

“Den e dokumentonan ku ta huntu ku e presupuesto tin e siguiente teksto komo splikashon pa e loke ta keda generá: E entrada lo subi ku 3.540.100 dòler. E subida aki ta keda efektuá pa medio di e subida di impuesto pa turista  ku un montante di 1.370.000 dòler. Esaki ta un muestra kla ku turismo tin un rendimentu haltu pa Boneiru. No por keda sin ilustrá ku e 17,9 mion ta solamente un parti chikitu di e loke turismo riba Boneiru ta generá”, asina Kroon a konkluí.