WILLEMSTAD/KRALENDIJK – For di e wikènt, hopi pasahero di Jetair ta keda pegá na diferente lugarnan den eksterior, awor ku e uniko avion operashonal di e kompania aéreo ta na tera pa mantenshon no planiá.

Buelanan pa lugarnan manera Medellín, Sint Maarten, y Aruba a risibí impakto. Ounke ku e kompania, manera ta kustumber, no a komuniká nada, ABC Online Media ta komprondé ku tin un problema ku un di e mashinanan di e avion Fokker 70, ku no por keda solushoná rapidamente. 

E plan aktual ta pa kita un motor for di e otro avion di Jetair ku actualmente no ta operashonal ku e mira pa pone esun ku sí ta operashonal bula atrobe. 

Lástimamente, lo por tuma vários dia mas promé ku e avion lo ta operashonal atrobe. 

Keho

Por a mira hopi  keho riba diferente media sosial, pasobra pasaheronan a indiká ku Jetair nan no a regla nada pa nan. Un grupo di pasaheronan ku ta keda pegá na Medellín a tende ku no tin solushon den futuro serkano i nan mes mester regla un pasashi nobo ku otro kompania. 

Esaki a kousa un indignashon grandi bou di e pasaheronan afektá, pasobra nan ta sinti ku Jetair a laga nan pa nan kuenta i no ta asumí responsabilidat.  Tambe, pa mayoria di e pasaheronan, no a regla nada relashoná ku kamber den hotèl pa akomodá nan, te ora ku Jetair kuminsá bula bèk.