KRALENDIJK- Aerolínea JetBlue a kuminsá ku benta di pasashi riba e ruta entre JFK Aeropuerto di New York i Aeropuerto Flamingo. E buelo ku a kedaanunsiá algun tempu pasá, por wòrdu kumprá tambe for di djarason. 

Pa selebrá introdukshon di e buelo nobo, tin tarifa un speshal disponibel pa un tempu limitá di 159 dòler pa ida òf buèlta. 

Direktor di TCB Miles Mercera ta bisa ku e ta hopi kontentu ku e buelo nobo. “E koperashon aki ta un logro importante pa nos: nos ta agregá un ruta nobo ku JetBlue i ta ofresé asina mas opshon pa pasahero ku ta bin for di e parti nort-ost di Merka.”

Tempran

Pasahero ku ke bula ku JetBlue pa Boneiru mester lanta trempan sí: E buelo ku ta wòrdu ehekutá dos biaha pa siman lo sali 7’or di mainta for di New York, pa yega Boneiru algu despues di mèrdia. E buelo di regreso ta sali for di Boneiru 2’or i 10 di atardi, pa yega  New York banda di 6’or i mei di anochi.