KRALENDIJK- Ku yegada di e promé buelo di e kompania di aviashon JetBlue, ta kumpli ku un soño di hopi tempu di e sektor turístiko pa diversifiká e posibilidatnan pa turista yega Boneiru.

Por papia di un trayekto hopi largu ku a kondusí na introdukshon di e buelonan di JetBlue. Tourism Corporation Bonaire (TCB) ya pa algun aña tabata papiando ku JetBlue pa por yega na algun buelo pa siman entre aeropuerto JFK di New York i Boneiru. Falta di sufisiente ekipo i tripulashon, a pone ku e buelonan a kuminsá mas lat ku lo a deseá.

Ta spera hopi di JetBlue pasombra e kompania ta konosí entre otro pa su preisnan abou, pero tòg ofresiendo un nivel di servisio basta bon. Tambe mester bisa ku hopi kaminda ku JetBlue a yega ku apenas 1 òf 2 buelo, esaki a krese i bira hopi mas den transkurso di tempu. Esaki, entre otro, tabata e kaso na Kòrsou.

Riesgo

Di otro banda tambe mester rekonosé ku tin sierto riesgo pa Boneiru si e buelonan no logra yena lo sufisiente i kaminda Gobièrnu di Boneiru lo mester bula aden. Tambe ta keda di mira si e buelonan, ku ta bin despues di esnan di American Airlines, United i Delta, di berdat lo mustra di ta di un balor agregá pa bishitante ku ke yega Boneiru for di área di New York.