ORANJESTAD – JetBlue Airways a anunsiá ku e lo oumentá su kapasidat di buelo pa Aruba pa e temporada di wenter 2023-2024. E kompania di aviashon tin e intenshon pa oumentá e kantidat di buelo di seis pa nuebe buelo pa dia, di moda ku 63 mil stul èkstra ta bira disponibel.

E ròl di JetBlue den industria turístiko di Aruba ta di vital importansia. Den e promé mitar di 2023 JetBlue a transportá mas ku 140 mil turista pa e isla.

JetBlue ta ehekutá buelo pa Aruba for di tres aeropuerto: JFK, Newark i Logan Airport na Boston. E pasaheronan ta hasi uzo di e A321Neo, ku ta ofresé e servisio ‘Mint’ premium riba e buelonan pa Aruba. Aruba ta un destinashon importante pa JetBlue, ku ta esun di sinku ku mas tantu stul di avion den Karibe e luna aki.

E kompania di aviashon a kuminsá su operashonnan na Aruba riba 15 di sèptèmber 2006 ku diferente buelo diario for di John F. Kennedy International Airport (JFK), nan base na New York. Despues JetBlue a amplia su servisionan i ta mantené un ret amplio di buelo for di nortost i sur di Merka pa Aruba.

JetBlue, ku a funda na ougùstùs 1998, a krese bira un kompania di aviashon ku 287 avion i ta realiá diariamente 1000 buelo pa diferente destinashon rònt mundu.