KRALENDIJK- Tourism Corporation Bonaire, Entidat Públiko Boneiru, Bonaire Hotel and Tourism Association (BONHATA) i Bonaire International Airport (BIA), den kolaborashon ku JetBlue, a anunsiá awe nan promé buelonan nòn stòp durante henter aña for di New York (JFK) pa Boneiru (BON).

E konekshon nobo akí ta djòin e portofolio variá di kompanianan aéreo merikano ku aktualmente ta ofresé buelo pa nos isla, pa kumpli ku e demanda kontinuo di biaheronan ku ke bishitá e destinashon karibense akí i ku ta konosí pa su kostanan inkreibel – ideal pa sambuyá i snòrkel –, su esena kulinario ku ta kresiendo i su aventuranan sin límite, leu for di e rutanan di kustumber. Mas lat den e luna akí pasashi lo ta na benta riba www.jetblue.com.

“Konektá New York ku nos isla ta marka un paso importante den desaroyo di rutanan di Flamingo Airport. Nos ta kontentu pa yama bon bini na bishitantenan na nos isla ku tur loke e tin pa ofrese,” segun Maarten van der Scheer, direktor di Bonaire International Airport. “E konekshon durante henter aña aki for di New York JFK Airport lo ekspande opshonnan di biahe pa nos bishitantenan merikano for di New York i parti nortost pa por biaha pa i for di nos isla.”

Segun Miles Mercera, direktor di Tourism Corporation Bonaire, ku huntu ku su tim a sigui traha estrechamente ku Entidat Públiko Boneiru, BONHATA i Bonaire International Airport pa oumentá e kantidat di buelo pa e destinashon akí: “Nos ta hopi kontentu ku e personanan ku ke biaha pa Boneiru, sea ku nan ta bini pa promé biaha òf ku nan ta bishitantenan ku ta bini bèk, awor akí tin mas opshon for di e ‘hub’ merikano importante akí pa fásilmente deskubrí tur loke nos pèrla karibense tin di ofresé.” 

Mas buelo lo sòru pa un impulso tambe pa ekonomia di Boneiru. Clark Abraham, diputado di Ekonomia i Turismo, ta anhelá pa yama bon biní na mas wéspet for di e merkado nort amerikano na nos isla. “E aña akí nos a konosé hopi desaroyo eksitante na nos isla,” segun Abraham. “For di apertura di restorantnan nobo i produktonan renobá di hotèl i risòrt te aktividatnan inspirá pa naturalesa i tournan aventurero, tur esakinan ta kosnan ku nos tur tin gana di laga nos bishitantenan mira, banda di nos dedikashon di hopi aña largu na sostenibilidat, nos kultura lokal i nos naturalesa bírgen.”

Dedikashon

“E logro akí ta suprayá e dedikashon konhunto di tantu sektor públiko komo sektor privá di nos isla na fortifikashon di nos sektor turístiko i stimulashon di nos ekonomia,” segun Veroesjka de Windt, direktor di BONHATA. “Ku binida di JetBlue nos ta premirá un kambio positivo konsiderabel den nos paisahe turístiko, pero e berdadero trabou ta nos dilanti ainda. Laga nos brasa e futuro prometedor ku ta nos dilanti i laga nos traha huntu pa realisá e potensial kompleto di esaki.”