WILLEMSTAD- Despues di dos kampaña pre-karnavalesko eksitoso den 2019 i 2020, Ministerio di Hustisia a enkargá Kuerpo Polisial ku e kampaña aki ku lo kontinuá kun’é den 2022.

Esaki ta sosodé den kolaborashon estrecho ku otro stakeholdersnan. E kampaña di konsientisashon, ta karga e título Sendé… ta konsiente! E ’slogan’ aki ta pa enfatisá ku e hóben mester ta mas konsiente di e eskohonan ku e ta hasi i ku e eskohonan aki tin nan konsekuensianan.

Adaptashon

A adaptá un k’e otro na e kampaña. Por ehèmpel, e kampaña lo kontinuá durante henter aña eskolar pues no durante periodo di karnaval so. Grupo 8 di skolnan primario tambe ta bini na remarke pa risibí charlanan di nos timnan multidisiplinario i a realisá un kolaborashon ku e kampaña “Legumai Beef, por otro!” di Ministerio Públiko pa ku e tema di violensia na skolnan i kon pa atendé ku esaki.

Temanan

E kampaña ta spesial dirigí riba hóbennan entre 10-24 i ta enserá ku timnan multidisiplinario ta drenta skol i duna charlanan di konsientisashon riba diferente temanan manera seksualidat, uzo di droga i alkohòl, ‘peer pressure’ na skolnan i agresividat. 

Esaki di un manera interaktivo kaminda ta dialogá ku e alumnonan riba e temanan aki. 

E timnan ta wòrdu re-enforsá dor di trahadónan di Ministerio Públiko, Kuerpo Polisial, Stichting AJJC, ministerio di GMN, SOAW, FMA i Stichting Slachtofferhulp. Kuerpo Polisial lo kontinuá ku e kampaña aki den e próksimo añanan den e diferente skolnan na Kòrsou den kuadro di su maneho preventivo.