KRALENDIJK- Riba 8 di novèmber pa 10:40’or di anochi, sentral di polis a risibí un notifikashon di kandela na e lèntfel Morotin pegá ku Rincon. Kuerpo di Bombero Hulanda Karibense situá na Rincon mesora a reakshoná sali i a eskalá e nivel di alarma ora nan a yega na e sitio, ku a pone e kuerpo desplegá vehíkulo i personal adishonal.

E kandela, ku tabata na tres diferente parti na e lèntfel, tabata konsistí prinsipalmente di palèt i material di palu. No tabatin otro material ku por a oumentá e riesgo pa hasi e kandela mas grandi. Kuerpo di Bombero a disidí pa laga e kandela paga su mes di manera kontrolá pa asina kontrolá e situashon efektivamente.

E huma no a plama den e bario di Rincon i no tabatin ningun riesgo pa e bisindario. Dos di e partinan kaminda tabatin kandela ta bou kontrol for di anochi i awor tin solamente un poko desaroyo di huma ku ta sali. Awe a tapa i kubri e di tres parti ku tabata na kandela i no tin riesgo ku e kandela lo plama mas. E situashon awor ta bou di kontrol.

Ta konsehá habitantenan pa tene bentana i porta será si nan eksperensiá kualkier molèster di huma. Kuerpo di Bombero ta keda vigilá e situashon i ta prepará pa kualke desaroyo nobo.