KRALENDIJK- Diputado di Salubridat Nina den Heyer ta bisa ku sigur tin kaso di mas Dengue riba e isla ku tabata e kaso den e añanan anterior, pero ku e kantidat total di kaso no ta oumentando mas pa algun siman ta mustra stabil. Segun departamentu di Salubridat Públiko ta trata di masomenos 17 persona pa siman ku ta keda infektá na e momentonan aki.

Tambe Den Heyer a bisa ku te awor aki danki dios no tin ningun persona na Boneiru ku a muri debí na infekshon di virus di Dengue i ku, pa 2024, te awor a keda hospitalisá dos persona relashoná ku komplikashonnan ku e virus a okashoná.

Di parti di Entidat Públiko Boneiru, semper tin investigashon antando pa detektá posibel luganan di bruimentu, spesialmente den barionan kaminda ku pashèntnan a keda infektá ku e virus. “Promé esaki tabata sosodé asta 7 dia pa siman, pero awor ku e kantidat di kaso nobo a stabilisá, e investigashon ta tumanado lugá 5 dia pa siman,” asina Den Heyer a bisa durante e konferensha di prensa siman semanal di djabièrnè ku a pasa.

Di e forma aki a hasi investigashon na 100 kas na e isla, mientras a bishitá un total di 400 posibel lugá ku e sanguranan por brui, pa determiná si e sangura di e tipo Aedes Aegypti ta presente. Durante e bishita ta trata e áreanan aki, di moda ku e sangura no por sigui brui na e lugánan ei.

Yuda

E diputado a hasi un yamada na siudadano pa yuda ku e kombatimentu di e sangura i su lugánan di brui. “Nos mes por hasi hopi tambe, por ehèmpel  tene bentana i porta será ora tin hopi sangura rondó di bo kas, pone paña ku ta tapa bo kurpa, òf usa un supstansia riba bo kurpa ku ta protehá kontra di sangura”, asina Den Heyer a bisa. 

Ya pa hopi tempu gobièrnu ta pasando spòt pa hasi un apelashon riba siudadano pa evitá ku sanguranan ta haña chèns pa brui, manera ophetonan den kual awa ta keda para despues di awaseru.